ရမ်ဘို ဇာတ်ကားသစ် LAST BLOOD စက်တင်ဘာ ၂၀ ရက် ရုံတင်မည်(ရုပ်သံ)

2019-09-18 13:35:46


ရမ်ဘို ဇာတ်ကားသစ် LAST BLOOD စက်တင်ဘာ ၂၀ ရက် ရုံတင်မည်(ရုပ်သံ)

ငယ်ဘဝကတည်းက ရင်းနှီးကြပြီးဖြစ်မယ့် ရမ်ဘို ပရိသတ်တွေ နှစ်သက်ကြမယ့် Rambo: Last Blood ရုပ်ရှင်ကို လာမယ့် စက်တင်ဘာလ ၂၀ ရက်နေ့မှာ ရုံတင်ပြသတော့မှာ ဖြစ်ပါတယ်။


Action Thriller အမျိုးအစား ရုပ်ရှင်ကားတကားဖြစ်တဲ့ ဒီရုပ်ရှင်ကားကိုတော့ Lionsgate ရုပ်ရှင်ထုတ်လုပ်ရေးက တင်ဆက်လိုက်တာဖြစ်ပြီး အမေရိကန် ရုပ်ရှင်ဒါရိုက်တာ Adrian Grunberg က ရိုက်ကူးပုံဖော်ပေးထားတာ ဖြစ်ပါတယ်။


ဒီရုပ်ရှင်ကားဟာ Rambo ရုပ်ရှင် Series တွေရဲ့ ၅ ကားမြောက် ရုပ်ရှင်အနေနဲ့ ထွက်ရှိလာခဲ့တာပါ။ ပထမဆုံး ရုပ်ရှင်ကိုတော့ First Blood နာမည်နဲ့ ၁၉၈၂ ခုနှစ်မှာ ထွက်ရှိခဲ့တာ ဖြစ်ပါတယ်။ အဲဒီနောက်မှာတော့ ၁၉၈၅ ခုနှစ်မှာ Rambo: First Blood Part II ၊ ၁၉၈၈ ခုနှစ်မှာ Rambo III နဲ့ လေးကားမြောက် ရုပ်ရှင်ကိုတော့ Rambo အမည်နဲ့ ၂၀၀၈ ခုနှစ်က နောက်ဆုံး ထွက်ရှိထားခဲ့တာမို့ အချိန် ၁၁ နှစ်အကြာမှာ ထပ်ပြီး ထွက်လာခဲ့တာ ဖြစ်ပါတယ်။


ဒီကားထဲမှာတော့ ဗီယက်နမ်စစ်ပြန်ဟောင်း တယောက်ဖြစ်တဲ့ John Rambo က သူငယ်ချင်းဖြစ်သူရဲ့ သမီးပြန်ပေးဆွဲခံရတာကို ကယ်တင်ဖို့၊ အကြမ်းဖက်မှုတွေ လုပ်ချင်တိုင်း လုပ်နေကြတဲ့၊ နာမည်ဆိုးနဲ့ ကျော်ကြားတဲ့ မူးယစ်အဖွဲ့အစည်းတခုနဲ့ ထိပ်တိုက်ရင်ဆိုင်ရမယ့် အခြေအနေတွေကို ဘယ်လိုဖန်တီးပုံဖော်ထားမလဲဆိုတာကို တော့ မကြာခင်မှာ စောင့်မျှော်ကြည့်ရှုကြရမှာ ဖြစ်ပါတယ်။


ဒီကားထဲမှာ Rambo အဖြစ် ဝါရင့်ဟောလိဝုဒ်သရုပ်ဆောင်မင်းသားကြီး Sylvester Stallone က ပါဝင်ထားပြီး သူနဲ့အတူ စပိန်သရုပ်ဆောင်မင်းသမီး Paz Vega နဲ့ တခြားသရုပ်ဆောင်တွေ အများကြီးက ပါဝင်ထားကြတာ ဖြစ်ပါတယ်။


ကြာမြင့်ချိန် ၈၉ မိနစ်ရှိတဲ့ ဒီကားထဲမှာ ပါဝင်တဲ့ ကြမ်းတမ်းတဲ့ အပစ်အခတ် ဇာတ်ဝင်ခန်းတွေ၊ ပြကွင်းပြ ကွက်တွေ၊ ပြောစကား Dialog တွေက အသက် ၁၇ နှစ် အောက် ကလေးငယ်တွေ ကြည့်ရှုဖို့ မသင့်တော်တာမို့ ဒီကားကို ကြည့်မယ်ဆိုရင်တော့ မိဘအုပ်ထိန်းသူ ခွင့်ပြုချက် Guideline နဲ့မှ ကြည့်ရှုသင့်တဲ့ Restricted R အဆင့် သတ်မှတ်ထားပါတယ်။


ထွက်ရှိခဲ့ပြီးဖြစ်တဲ့ Rambo ရုပ်ရှင်ကားတွေဟာ ပရိသတ် အားပေးလက်ခံမှုတွေ ရှိခဲ့ပြီး လက်ရှိအချိန်ထိ စုစုပေါင်းဝင်ငွေ အမေရိကန်ဒေါ်လာသန်း ၇၀၀ ကျော် ရရှိခဲ့ပြီး ဖြစ်ပါတယ်။ ဒီကားတွေထဲမှာ အအောင်မြင်ဆုံးဖြစ်တဲ့ Rambo: First Blood Part II ရုပ်ရှင်ကတော့ Box Office ဝင်ငွေ အမေရိကန်ဒေါ်လာသန်း ၃၀၀ ကျော် ရရှိခဲ့တာမို့ ခုနောက်ဆုံး ထွက်ကားကရော ရုံတင်ဝင်ငွေစံချိန်တင်နိုင်ပါ့မလားဆိုတာကိုတော့ စောင့်မျှော်ကြည့်ရှုကြရမှာပဲ ဖြစ်ပါတယ်။




Credit: DVB TV News