ရင်တထိတ်ထိတ်နဲ့ ရှုစားကြရမည့် အင်ဒိုနီးရှားသရဲကား-DEATH WHISPER ရုံတင်ပြီ (ရုပ်သံ)

2019-09-19 13:34:05


ရင်တထိတ်ထိတ်နဲ့ ရှုစားကြရမည့် အင်ဒိုနီးရှားသရဲကား-DEATH WHISPER ရုံတင်ပြီ (ရုပ်သံ)

သွေးပျက်ထိတ်လန့်စရာကောင်းတဲ့ ပြကွင်းပြကွက်တွေ၊ မြင်ကွင်းတွေနဲ့ ရှုစားကြရမယ့် အင်ဒိုနီးရှားသရဲကားတကားဖြစ်တဲ့ Death Whisper ကို မြန်မာနိုင်ငံမှာ စက်တင်ဘာလ ၁၉ ရက်နေ့မှာ ရုံတင်ပြသတော့မှာ ဖြစ်ပါတယ်။ဒီကားကိုတော့ ဒါရိုက်တာ Awi Suryadi က ရိုက်ကူးပုံဖော်ပေးထားခဲ့တာဖြစ်ပြီး အင်ဒိုနီးရှားနိုင်ငံမှာတော့ ပြီးခဲ့တဲ့ ဧပြီလ ၁၁ ရက်နေ့ကတည်းက ရုံတင်ပြသခဲ့တာ ဖြစ်ပါတယ်။


၁၉၉၈ ခုနှစ်က ထွက်ရှိခဲ့တဲ့ ကိုရီးယားရုပ်ရှင် Whispering Corridors ကို အခြေခံပြီး ပြန်ရိုက်ထားတဲ့ ဒီရုပ်ရှင်ကားကတော့ အထက်တန်းကျောင်းတွေရဲ့ တင်းကျပ်တဲ့ စနစ်အောက်မှာ အနိုင်ကျင့်ခံရတဲ့ အကြောင်းတွေကို ဇာတ်အိမ်တည်ထားခဲ့တာ ဖြစ်ပါတယ်။


အဲလက်စ်ဟာ နာမည်ကြီး အထက်တန်းကျောင်းတခုကို ဝင်ခွင့် ရရှိခဲ့ပြီးနောက်မှာတော့ အများက ထင်ကြသလို ဂုဏ်ယူစရာ၊ အထင်ကြီး အားကျစရာ အခြေအနေတွေ တခုမှ ဖြစ်မလာခဲ့ဘဲ ငရဲခန်းတခုလို စာသင်ခန်းတခုထဲ ရောက်ရှိသွားခဲ့ပါတယ်။


ဘာလို့လဲဆိုတော့ ကျောင်းသားအချင်းချင်း အနိုင်ကျင့် ဆက်ဆံကြတဲ့ အခြေအနေတွေကြားမှာ ရှိနေခဲ့ရလို့ပါပဲ တနေ့မှာတော့ သူဟာ မက်ဂီ ဆိုတဲ့ ကောင်မလေးတယောက်နဲ့ ခင်မင်ပြီး သူငယ်ချင်းတွေ ဖြစ်သွားခဲ့ကြပါတယ်။ ဒါပေမဲ့ တရက်မှာတော့ သူ့ကို အတန်းဖော်တွေက သရဲ ခေါ်တဲ့နေရာမှာ အတင်းဝင်ပါခိုင်းခဲ့ချိန်မှာတော့ ထင်မှတ်မထားတဲ့ ထူးဆန်းတဲ့ အဖြစ်အပျက်တွေ၊ သွေးပျက်ထိတ်လန့်စရာကောင်းတဲ့ မြင်ကွင်းတွေ မြင်လာရချိန်မှာတော့ ဘယ်လိုတွေ ဆက်ဖြစ်လာမလဲ ဆိုတာတွေကို ဒီကားထဲမှာ ရှုစားကြရမှာပါ။


ဒီကားထဲမှာ အဓိကသရုပ်ဆောင်တွေအနေနဲ့ Amanda Rawles နဲ့ Angga Yunanda တို့က ခေါင်းဆောင်ပါဝင်ထားကြပြီး တခြားသရုပ်ဆောင်တွေလည်း ပါဝင်ထားကြတာ ဖြစ်ပါတယ်။


ဒီကားထဲမှာ ပါဝင်တဲ့ ကြမ်းတမ်းတဲ့ ကြောက်မက်ဖွယ် မြင်ကွင်းတွေ၊ ပြကွင်း ပြကွက်တွေ၊ ပြောစကား Dialog တွေက အသက် ၁၃ နှစ်အောက် ကလေးငယ်တွေ ကြည့်ရှုဖို့ မသင့်တော်တာမို့ ဒီကားကို ကြည့်မယ်ဆိုရင်တော့ မိဘအုပ်ထိန်းသူ ခွင့်ပြုချက် Guideline နဲ့မှ ကြည့်ရှုသင့်တဲ့ PG-13 အဆင့် သတ်မှတ်ထားပါတယ်။


ကြာမြင့်ချိန် ၉၁ မိနစ်ရှိတဲ့ ဒီရုပ်ရှင်ကားထဲမှာတော့ အင်ဒိုနီးရှား ဘာသာစကားကို အသုံးပြုထားပြီး IMDb မှာတော့ Rating 6.7 အထိ ရရှိထားပါတယ်။



Credit: DVB TV News