အယ်လီဆန်၊ အတ်ဒရီယန်၊ ကလယ်ဟာနဲ့ ပီတာလူးဂါတို့ရဲ့ အနာဂတ်ကို စီစဉ်ပေးမယ့် လီဗာပူး


အယ်လီဆန်၊ အတ်ဒရီယန်၊ ကလယ်ဟာနဲ့ ပီတာလူးဂါတို့ရဲ့ အနာဂတ်ကို စီစဉ်ပေးမယ့် လီဗာပူး

လီဗာပူးအသင်းဟာ ဘရာဇီးဂိုးသမား အယ်လီဆန်နဲ့ စာချုပ်သစ်ကိစ္စကို စကားပြောဖို့ စတင်လိုနေပြီး ကိုပါအမေရိက ပြိုင်ပွဲပြီးလို့ ဂိုးသမားဖြစ်သူ ကလပ်ထံ ပြန်ရောက်လာခဲ့ရင် တရားဝင် ဆွေးနွေးမှု စတင်မယ်လို့ သိရပါတယ်။


လက်တလောမှာ ကမ္ဘာဖလား ခြေစစ်ပွဲအတွက် အီကွေဒေါ၊ ပါရာဂွေးတို့ဖြင့် ယှဉ်ပြိုင်သွားမယ့် ဘရာဇီးအသင်းနဲ့အတူ အယ်လီဆန် လေ့ကျင့်ရေး ဝင်နေတာပါ။ အဆိုပါ ပွဲတွေအပြီး ကိုပါ အမေရိက ပြိုင်ပွဲကို ဇွန်လ ၁၃ ရက်နေ့မှာ စတင်ကျင်းပသွားမှာဖြစ်တယ်။


အယ်လီဆန်က လီဗာပူးနဲ့ ၂၀၂၄ ခုနှစ်ထိ စာချုပ်ရှိပေမယ့်လည်း သူ့ကို စာချုပ်သစ် ထပ်ပေးဖို့ ကလပ်ဘက်က ဆန္ဒရှိနေပါတယ်။ ၂၀၁၈ ခုနှစ်မှာ ရိုးမားအသင်းကနေ ပေါင် ၆၇.၅ သန်းဖြင့် ခေါ်ယူခြင်း ခံခဲ့ရတဲ့ အယ်လီဆန်ဟာ ထိုစဉ်တုန်းက ကမ္ဘာစံချိန်တင် ပြောင်းရွှေ့ကြေးဖြင့် လီဗာပူးကို ရောက်လာခဲ့သူဖြစ်တယ်။


အသက် ၂၈ နှစ်အရွယ် ဂိုးသမားဖြစ်သူကို စာချုပ်သစ်ပေးခြင်းဟာ သူ့ကို လီဗာပူးအသင်းမှာပဲ ကစားသမားဘဝ နောက်ဆုံး အချိန်လောက်ထိ ဆက်ရှိနေဖို့ ရည်ရွယ်ခြင်းလည်း ဖြစ်လာပါမယ်။ အယ်လီဆန်ဟာ ၂၀၁၉ ချန်ပီယံလိဂ် အောင်မြင်မှု၊ ၂၀၂၀ ပရီးမီးယားလိဂ်ဖလား အောင်မြင်မှုတွေမှာ လီဗာပူးအတွက် အဓိကကျခဲ့သူလည်းဖြစ်တယ်။


လီဗာပူးဘက်ကတော့ အယ်လီဆန်အပြင် အသက် ၃၄ နှစ်အရွယ် ဂိုးသမား အတ်ဒရီယန်ကိုလည်း သက်တမ်းတိုးဖို့ ပြင်ဆင်နေပါတယ်။ စပိန်သား ဂိုးသမားကို လာလီဂါကလပ် ဘက်တစ်အသင်းက ခေါ်ယူလိုပေမယ့် စာချုပ်သစ်ကိစ္စ စကားပြောနိုင်မယ်လို့ လီဗာပူးဘက်က ယုံကြည်နေတယ်။


အသက် ၂၂ နှစ်အရွယ် လူငယ်ဂိုးသမား ကလယ်ဟာကိုတော့ ပုံမှန်ပွဲထွက်ခွင့်ပေးမယ့် ကလပ်တစ်သင်းထံ အငှားချပေးဖို့ လီဗာပူးဘက်က စီစဉ်နေခဲ့ကာ တတိယဂိုးသမားအဖြစ် ပြီးခဲ့တဲ့ ဇန်နဝါရီကမှ ဖလူမီနက်စ် အသင်းကနေ ခေါ်ယူထားတဲ့ လူငယ်ဂိုးသမားလေး ပီတာလူးဂါကို ထားရှိမယ်လို့ ကြားသိရတာ ဖြစ်ပါတယ်။