အချိန်ပိုင်း အလုပ်သမားအဖြစ်မှ လက်ရွေးစင် အသင်းခေါင်းဆောင်အဖြစ် ယူရိုကို သွားမယ့် ရိုဘို


အချိန်ပိုင်း အလုပ်သမားအဖြစ်မှ လက်ရွေးစင် အသင်းခေါင်းဆောင်အဖြစ် ယူရိုကို သွားမယ့် ရိုဘို

‘ပိုက်ဆံမရှိရင် ဘဝကြီးက အလကားပါပဲကွာ’ ဆိုတဲ့ စကားကတော့ ၂၀၁၂ ခုနှစ် သြဂုတ်လ ၈ ရက်နေ့မှာ ရော်ဘတ်ဆန်ဆိုတဲ့ ဆယ်ကျော်သက်လေး တစ်ဦးက သူ့ရဲ့ တွစ်တာမှာ ရေးသားခဲ့တာပါ။


အဲ့တုန်းက သူတွဲတင်ခဲ့တဲ့ # ကတော့ အလုပ်လိုတယ်လို့ ဖြစ်ပါတယ်။ ငယ်ရွယ်တဲ့ စကော်တလန်သားလေးဟာ ထိပ်ဆုံးကို ရောက်လာဖို့ဆိုတဲ့ ကြီးမားတဲ့ အိပ်မက်တစ်ခုလည်း မက်ခဲ့ရသူဖြစ်တယ်။ Queen’s Park က စူပါမားကတ်မှာ အချိန်ပိုင်း အလုပ်လုပ်ရင်း အဆင်မပြေမှုတွေကြားက သူ့အိပ်မက်တွေကို ဆက်မက်ခဲ့ရတယ်။


စကော်တလန်က သာမာန် လူငယ်လေးဟာ လူကောင်သိပ်သေးလွန်းတယ်ဆိုတဲ့ အကြောင်းပြချက်နဲ့ပဲ ဆဲလ်တစ်အသင်းက ထုတ်ပယ်ခံခဲ့ရတယ်။ လူအတော်များများကတော့ ဒီသေးကွေးတဲ့ ကောင်းငယ်လေးက အနာဂတ်မှာ ထူးချွန်တဲ့ ကစားသမားကောင်းတစ်ယောက် ဖြစ်လာမှာ မဟုတ်ဘူးလို့လည်း ယူဆခဲ့ကြတယ်။


ဘဝရဲ့ နိမ့်ပါးခြင်းတွေကြားမှာ ရုန်းထရင်း နောက်တော့ သူဟာ လီဗာပူး ဘယ်အစွန်လူဖြစ်လာခဲ့တယ်။ လီဗာပူးအသင်း မဟာဂန္တဝင်ကြီး ဆာကင်နီရဲ့ အနာဂတ်မှာ တောက်ပလာမယ့် ကစားသမားလိ့ လေးစား တန်ဖိုးဖြတ်ခြင်းခံခဲ့ရတယ်။ နောက်တော့ သူဟာ ချန်ပီယံလိဂ်ဖလားနဲ့ ပရီးမီးယားလိဂ်ဖလားတို့လည်း အောင်မြင်သူ ဖြစ်လာခဲ့တယ်။


ဒါပေမယ့်လို့ ရော်ဘတ်ဆန်အတွက် အကြီးမားဆုံး အောင်မြင်မှုက နက်ပြာရောင် စကော်တလန် အသင်းကို ယူရို ၂၀၂၀ ပြိုင်ပွဲကို ပါဝင်ယှဉ်ပြိုင်ဖို့ ဦးဆောင်သူ အသင်းခေါင်းဆောင်အဖြစ် စွမ်းဆောင်ပြခဲ့ခြင်းပဲ ဖြစ်ပါတယ်။


စကော်တလန်သမိုင်းမှာ အဆိုးရွားဆုံး အသင်းခေါင်းဆောင်ဆိုတဲ့ ဝေဖန်မှုတွေကနေပဲ ဆယ်စုနှစ် ၂ ခုကြာလောက် စကော်တလန်အသင်း ဝေးကွာနေတဲ့ ဥရောပ အထင်ကရ ပြိုင်ပွဲကြီးကို သူဦးဆောင်တဲ့ လက်ရွေးစင်အသင်းက ရောက်လာခဲ့ပါပြီ။


အချိန်ပိုင်း အလုပ်သမားအဖြစ်ကနေ ချန်ပီယံလိဂ်၊ ပရီးမီးယားလိဂ် အနိုင်ရသူအဖြစ် ယူရိုပြိုင်ပွဲထံ စကော်တလန်ကို ဦးဆောင်လာတဲ့ ရော်ဘတ်ဆန်ရဲ့ ခရီးလမ်းဟာ ကျေနပ် ဂုဏ်ယူစရာဖြစ်လာခဲ့ပြီ ဖြစ်ပါတယ်။