ပြည်ပရောက် မြန်မာတွေရဲ့ အကူအညီ အတိုင်ပင်ခံပုဂ္ဂိုလ် ဖိတ်ခေါ်

2020-01-14 09:31:53


ပြည်ပရောက် မြန်မာတွေရဲ့ အကူအညီ အတိုင်ပင်ခံပုဂ္ဂိုလ် ဖိတ်ခေါ်

ပြည်ပရောက် မြန်မာတွေရဲ့ အကူအညီ အတိုင်ပင်ခံပုဂ္ဂိုလ် ဖိတ်ခေါ်


မြန်မာနိုင်ငံမှာ လိုအပ်နေတဲ့ လူ့စွမ်းအားအရင်းအမြစ် လိုအပ်ချက်ကို ဖြည့်ဆည်းနိုင်ရေးအတွက် နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်ရဲ့ ပြည်ပခရီးစဉ်တွေအတွင်း မြန်မာနိုင်ငံသား၊ မြန်မာနိုင်ငံသားဟောင်းများက မိမိတို့ တတ်သိ ကျွမ်းကျင်တဲ့ ပညာ၊ အတွေ့အကြုံတို့နဲ့ တတ်အားသမျှ ပါဝင်ကူညီပံ့ပိုး အကျိုးပြုနိုင်ရန် တင်ပြခဲ့ကြတဲ့အတွက် မြန်မာနိုင်ငံသားများကို ဖိတ်ခေါ်ကြောင်း ဆွစ်ဇာလန်နိုင်ငံ၊ ဂျနီဗာမြို့မှာရှိတဲ့ မြန်မာသံရုံးက ဇန်နဝါရီလ ၁၃ ရက်နေ့ ရက်စွဲနဲ့ ကြေညာချက် ထုတ်ပြန်လိုက်တာပါ။


မြန်မာနိုင်ငံမှာ လက်ရှိဖော်ဆောင်နေတဲ့ ပြုပြင်ပြောင်းလဲရေးလုပ်ငန်းတွေအတွက် လူ့စွမ်းအား အရင်းအမြစ် လိုအပ်နေတာကြောင့် ပြည်ပရောက် မြန်မာနိုင်ငံသားတွေအနေနဲ့ ပါဝင်ကူညီပုံပိုး အကျိုးပြုကြဖို့ နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က ပြည်ပရောက် မြန်မာနိုင်ငံသားတွေနဲ့ တွေ့ဆုံပွဲတွေမှာ ဖိတ်ခေါ်ခဲ့တဲ့အတွက် အခုလို ကြေညာချက် ထုတ်ပြန်တာလို့ ဆိုပါတယ်။


ပြည်ပရောက်နေကြတဲ့ မြန်မာနိုင်ငံသားဟောင်းတွေနဲ့ မြန်မာနိုင်ငံသား တတ်သိပညာရှင်၊ အတတ်ပညာရှင်တွေအနေနဲ့ မိမိတို့ တတ်သိ ကျွမ်းကျင်တဲ့ ပညာ၊ အတွေ့အကြုံတွေနဲ့ တတ်အားသမျှ ပါဝင်ကူညီပံ့ပိုး အကျိုးပြုလိုတယ်ဆိုရင် ဂျနီဗာမှာရှိတဲ့ မြန်မာကောင်စစ်တာဝန်ခံ အရာရှိထံ ဆက်သွယ်ကြဖို့နဲ့ ဆက်သွယ်ရမယ့် ဖုန်းနံပတ်နဲ့ အီးမေး လိပ်စာအပြင် အဲဒီအတွက် လိုအပ်တဲ့ ပုံစံ ဖောင်ဖြည့်ဖို့အတွက်ပါ ပူးတွဲ ထုတ်ပြန်လိုက်တာပါ။


ဖြည့်စွက်ရမယ့် ဖောင်ထဲမှာတော့ မိမိတို့ရဲ့ အမည်၊ မွေးဖွားရာဇာတိ၊ လူမျိုး၊ လက်ရှိ အလုပ်အကိုင်၊ နိုင်ငံကူးလက်မှတ် နံပတ်၊ လေ့လာ သင်ယူခဲ့တဲ့ ပညာရပ်၊ တက္ကသိုလ်၊ ကျွမ်းကျင်တဲ့နယ်ပယ်၊ ပါဝင် အကျိုးပြုလိုတဲ့အခန်းကဏ္ဍ၊ ပါဝင်ကူညီနိုင်တဲ့ ပြည်တွင်း၊ ပြည်ပ နေရာ စတာတွေအပြင် တခြား ကိုယ်ရေးအချက်တချို့ကိုလည်း ဖော်ပြပေးရမှာ ဖြစ်ပါတယ်။