CORONAVIRUS အန္တရာယ် မြန်မာနိုင်ငံသားတွေ သတိရှိဖို့ ဘေကျင်းမြန်မာသံရုံး နှိုးဆော်

2020-01-24 22:28:08


CORONAVIRUS အန္တရာယ် မြန်မာနိုင်ငံသားတွေ သတိရှိဖို့ ဘေကျင်းမြန်မာသံရုံး နှိုးဆော်

CORONAVIRUS အန္တရာယ် မြန်မာနိုင်ငံသားတွေ သတိရှိဖို့ ဘေကျင်းမြန်မာသံရုံး နှိုးဆော်


လူသေဆုံးတဲ့အထိ ကူးစက်နေတဲ့ Coronavirus အန္တရာယ်ကို တရုတ်နိုင်ငံရောက် မြန်မာနိုင်ငံသားတွေ သတိထားကြဖို့ မြန်မာသံရုံးက သတိပေးလိုက်ပါတယ်။ အထူးသဖြင့် Hubei ပြည်နယ်ထဲက ရောဂါပိုး စတင်ပျံ့နှံ့ခဲ့တဲ့ Wuhan မြို့မှာ နေထိုင်ကြတဲ့ မြန်မာနိုင်ငံသားတွေ အနေနဲ့ တရုတ်အစိုးရနဲ့ ဒေသခံအာဏာပိုင်တွေ၊ ကျန်းမာရေးဌာန တာဝန်ရှိသူတွေရဲ့ လမ်းညွှန်ချက်တွေကို လိုက်နာကြဖို့ တိုက်တွန်းထားတာပါ။


သက်ဆိုင်ရာ အာဏာပိုင်တွေ ထုတ်ပြန်တဲ့ စည်းမျဉ်းစည်းကမ်းတွေကို အတိအကျ လိုက်နာဖို့နဲ့ အခက်အခဲရှိရင် ဘေဂျင်းမြို့တော်က မြန်မာသံရုံးကို ဆက်သွယ်အကူအညီ တောင်းခံနိုင်ကြောင်းလည်း မနေ့တုန်းက ရက်စွဲနဲ့ ထုတ်ပြန်တဲ့ ကြေညာချက်မှာ ဖော်ပြထားပါတယ်။


ဗိုင်းရပ်စ်ပိုး ကူးစက်မှုကြောင့် လူပေါင်း ၂ ဒါဇင်လောက်သေဆုံးပြီး တရုတ်နိုင်ငံတွင်းမှာ လူပေါင်း ၈၀၀ ကျော်အပြင်ပြည်ပနိုင်ငံတွေမှာပါ ကူးစက်သူတွေလည်း ရှိနေပါတယ်။


Wuhan မြို့က စလိုက်တဲ့ ဗိုင်းရပ်စ်ပိုး ပျံ့နှံ့မှုဟာ တရုတ်နိုင်ငံ ဘေဂျင်း၊ ရှန်းဟိုင်းနဲ့ ဂွမ်ဒေါင်း ပြည်နယ်တွေလို မြို့ကြီးတွေအပြင်၊ ဂျပန်၊ တောင်ကိုရီးယား၊ ထိုင်း၊ ထိုင်ဝမ်နဲ့ အမေရိကန်အထိ ကူးစက်ခံနေရတာပါ။ တရုတ်နိုင်ငံနဲ့ အိမ်နီးချင်း မြန်မာနိုင်ငံမှာတော့ ကူးစက်မှုရှိတဲ့ သတင်းတွေ မကြားရသေးပေမဲ့ ကြိုတင်ကာကွယ်ရေး အစီအမံတွေ ချမှတ်ထားကြောင်း ကျန်းမာရေးအာဏာပိုင်တွေက ပြောဆိုထားကြတာပါ။


Wuhan မြို့ကနေ တ မနေ့တုန်းက မြန်မာနိုင်ငံကို တိုက်ရိုက်ပျံသန်းလာတဲ့ လေယာဉ်တစင်းမှာ လိုက်ပါလာတဲ့ ခရီးသည်တချို့ကို စစ်ဆေးခဲ့ရာမှာ ရောဂါကူးစက်မှု မတွေ့ရကြောင်းလည်း တာဝန်ရှိသူတွေက ပြောပါတယ်။


ထိုင်းနိုင်ငံမှာတော့ ၅ ယောက်မြောက် ကူးစက်သူတဦး တွေ့ရှိခဲ့ကြောင်း ဒီကနေ့ပဲ အတည်ပြုခဲ့တာပါ။ တရုတ်နိုင်ငံ Wuhan မြို့က ပြန်လာတဲ့ အသက် ၃၃ နှစ်အရွယ် အမျိုးသမီးမှာ ဗိုင်းရပ်စ်ပိုး ကူးစက်နေတာ တွေ့ရှိခဲ့တာဖြစ်ပြီး၊ ဒါဟာဆိုရင် ထိုင်းနိုင်ငံမှာ လေဆိပ်မှာ စစ်ဆေးစဉ်မှာ ကူးစက်မှုမတွေ့ခဲ့ဘဲ နောက်ပိုင်းကျမှ သိရတဲ့ ဒုတိယမြောက်လူနာ ဖြစ်ကြောင်းလည်း လူထုကျန်းမာရေး ဒုတိယဝန်ကြီး Sathit Patucha ကို ကိုးကားပြီး Reuters သတင်းက ဖော်ပြခဲ့ပါတယ်။


VOA Burmese News